Կորոնավիրուսով վարակված պացիենտներին բուժող վարակաբանը 3 ամիս տանը չի եղել. նա եւս վարակվել է եւ ապաքինվել - Erevan.live

Լրահոս

կարդացեք նաև

9/01/2020

Կորոնավիրուսով վարակված պացիենտներին բուժող վարակաբանը 3 ամիս տանը չի եղել. նա եւս վարակվել է եւ ապաքինվել

Հայաստանում կորոնավիրուսի պանդեմիայի թեժ շրջանում բժիշկ Կ.-ն 3 ամիս չի եղել տանը: Այդ ընթացքում նա եւս վարակվել է կորոնավիրուսով, 5 օր անցկացրել վերակենդանացման բաժանմունքում, ապա բուժվել սովորական հիվանդասենյակում:

Բժիշկ Կ.-ն վարակաբան է Երեւանի կլինիկաներից մեկում: Նա ցանկացել է պահել անանունությունը, քանի որ իր հարազատներից շատերը չգիտեն, որ վարակվել է կորոնավիրուսով:

NEWS.am Medicine-ի հետ զրույցում բժիշկն ասաց, որ գարնան սկզբին իրավիճակը ինչպես երկրում, այնպես էլ կլինիկայում հանգիստ էր, եւ պացիենտներն այդքան էլ շատ չէին: Սակայն աստիճանաբար նրանց թիվը սկսեց աճել, եւ մայիսի կեսերին պացիենտների թիվն այնքան ավելացավ, որ բուժանձնակազմը չէր հասցնում ոչ միայն տուն գնալ, այլ նույնիսկ նորմալ չէր կարողանում ճաշել աշխատանքի ժամանակ: Բժիշկը, ինչպես եւ իր շատ գործընկերներ, սկսել են գիշերել իրենց աշխատավայրում: Բժիշկը քնել է իր աշխատասենյակում, իսկ հարազատների հետ երբեմն շփվել է հեռախոսով:

Հուլիսի սկզբին մի օր առավոտյան բժիշկ Կ.-ն արթնացել է ստամոքսի ցավով եւ սրտխառնոցով: Նրա ջերմությունը բարձր չի եղել՝ 37 աստիճան: Քանի որ կորոնավիրուսի ոչ մի ախտանիշ չի եղել, նա մտածել է, թե դա սովորական մրսածություն է:

Սակայն մի քանի օր անց ջերմությունը բարձրացել է 38 աստիճան, չոր հազ եւ թուլություն է սկսվել: Այդ ժամանակ նա կորոնավիրուսի թեստ է հանձնել, որի արդյունքը դրական է եղել:

Իր աշխատասենյակից բժիշկ Կ.-ին տեղափոխել են հիվանդասենյակ, սակայն քանի որ ինքնազգացողությունն այդքան վատ չի եղել, նա շարունակել է աշխատել: Այդ օրերին պացիենտները շատ են եղել, եւ բժիշկ Կ.-ն մտածել է, որ այդ իրավիճակում վարակաբանն իրեն չի կարող թույլ տալ պարզապես նստել կամ պառկել, նույնիսկ եթե հիվանդ է:

Հաջորդ օրը նրա վիճակը կտրուկ վատացել է. սատուրացիան ընկել է մինչեւ 74 (նորման՝ 93-94), դժվարությամբ է շնչել, ջերմությունը չի իջել, անհանգստացրել են ընդհանուր թուլությունն ու հեւոցը:

Անհանգստացած գործընկերները նրան տեղափոխել են վերակենդանացման բաժանմունք, որտեղ նա 5 օր է անցկացրել:

Բժիշկ Կ.-ի բուժումը տեւել է գրեթե 1 ամիս: Նրա խոսքով՝ այդ դժվար օրերին բժիշկներին աջակցել են կլինիկական օրդինատորներն ու բարձր կուրսերի ուսանողները:

«Մենք բժիշկների հրաշալի սերունդ ունենք: Վերջերս ավարտածներն ու ուսումը շարունակող ուսանողները օգնել են բժիշկներին: Նրանք հիշել են այն ամենը, ինչ սովորեցրել են իրենց եւ ինչ տեսել են: Կարծում եմ՝ նրանք հիանալի բժիշկներ կդառնան»,-ասել է նա:

Վարակաբանի խոսքով՝ ինքը վստահ է, որ վարակվել է կորոնավիրուսով ոչ այն ժամանակ, երբ աշխատել է վարակված պացիենտների հետ, քանի որ կրել է պաշտպանիչ կոստյում եւ հետեւել է անվտանգության բոլոր ցուցումներին: Բուժանձնակազմի մոտ եւս հիվանդության բռնկում չի եղել, հիվանդանոցում վարակվել է եւս մեկ բժիշկ, սակայն նրանից մեկ ամիս հետո:

Այժմ բժիշկ Կ.-ն առողջ է: Օգոստոսին՝ բացակայությունից 3 ամիս անց, նա վերջապես կարողացել է տուն վերադառնալ:

Նրա խոսքով՝ այսօր պացիենտների կրճատվում է, եւ բժիշկները կարողանում են խորը շունչ քաշել: Սակայն դեռ դժվար է ասել, թե արդյոք կորոնավիրուսի երկրորդ ալիք կլինի աշնան գալուն պես: Վարակաբանը խորհուրդ է տալիս նույնիսկ հիմա պահպանել զգոնությունն ու ամեն հնարավոր ամեն ինչ չվարակվելու համար:   


Комментариев нет: