Հեղափոխություն ենք արել, որ չասեն՝ դիմում գրի գնա, արա. թաղապետի դեմ հաղորդում տված աշխատակիցը՝ միջադեպի մասին - Erevan.live

Լրահոս

Այսուհետ մեը հոդվածների մի մասը կլինի անգլերեն հատուկ արտասահմանի համար

From now on, some of our articles will be in English specifically for foreigners


կարդացեք նաև

6/20/2020

Հեղափոխություն ենք արել, որ չասեն՝ դիմում գրի գնա, արա. թաղապետի դեմ հաղորդում տված աշխատակիցը՝ միջադեպի մասին



Շենգավիթ վարչական շրջանի աշխատակազմում համակարգչային օպերատոր աշխատող 52–ամյա Գևորգ Պողոսյանը, որն իր նկատմամբ բռնություն կիրառելու վերաբերյալ ոստիկանությունում հաղորդում է ներկայացրել Շենգավիթի թաղապետի, նրա տեղակալի և օգնականի դեմ,  այսօր՝ հունիսի 19–ին դատաբժշկական փորձաքննության է ենթարկվել։ Այս մասին NEWS.am–ի հետ զրույցում ասաց Գևորգ Պողոսյանը։ Վերջինիս խոսքով՝ դատաբժշկական փորձաքննությամբ հիմնավորվել է, որ իր վրա առկա են թեթև վնասվածքներ։ Պողոսյանի պնդմամբ՝ իրեն հարվածել են միայն ձեռքերով և այն տեղեկությունները, թե իբր իրեն գցել են գետնին և ծեծել, չի համապատասխանում իրականությանը։

 «Գետնին որ ընկել եմ, ինձ ոչ ոք չի հարվածել»,–ասաց Պողոսյանը։


Նրա խոսքով՝ միջադեպի պատճառը եղել է այն, որ վարչական շրջանի ղեկավարը ստիպել է իրեն դիմում գրել, սակայն ինքը հրաժարվել է։

Պողոսյանը վստահեցնում է, որ պատշաճ կերպով  կատարել իր աշխատանքային պարտականությունները, սակայն իրենից պահանջել են իրականացնել նաև այլ գործառույթներ։

«Ես չեմ կարծում, որ թերացել եմ իմ աշխատանքում, ինձնից պահանջել են համակարգչային մոնտաժ, ինչը սակայն հավելյալ աշխատանք է, դա իմ գործառույթի մեջ չի մտնում, ես հաստիքով համակարգչային օպերատոր եմ, մոնտաժն առանձին մասնագիտություն է, առանձին որակավորում, ես այս տարիքում ո՞նց նորից սովորեմ, աշխատեմ»,–ասաց մեր զրուցակիցը։ Դիտարկմանը, թե  Շենգավիթ վարչական շրջանի ղեկավար Ռազմիկ Մկրտչյանն է Ձեզ  ընդունել աշխատանքի, ասել է թե՝ թաղապետի բերած կադրն եք՝ Պողոսյանը արձագանքեց. «Լավ է արել, ընդունել է. ես էլ իմ աշխատանքը պատշաճ կերպով կատարել եմ։ Ինչ ասել են՝ կատարել եմ. իմ պարտականությունների մեջ չի մտել մեքենայով օգնություն բաժանել, սակայն արտակարգ դրության օրերին դա էլ եմ արել։ Եթե հիմք ունեին, թող ազատեին աշխատանքից, իրավական երկրում ենք ապրում, ինչի՞ համար ենք հեղափոխություն արել, որ ֆեոդալական հասարակարգը վերանա, որ չասեն՝ դիմում գրի գնա, արա՛»,–հայտարարեց աշխատակիցը։  Նշենք, որ միջադեպից հետո Պողոսյանն աշխատանքից ազատման դիմում չի գրել և շարունակում է ներկայանալ աշխատանքի։

Հարցին՝ միջադեպից հետո դժվար չէ՞  արդյոք նման լարված մթնոլորտում աշխատելը, Պողոսյանն արձագանքեց. «Էնպես չէ, որ լարված է մթնոլորտը, ով որ խելք ունի, իրեն ճիշտ է պահում, չի խառնվում։ Ես թաղապետարանում հարգանք ու պատիվ ունեմ, շատ սիրալիր, տեղը տեղին իմ պարտականությունները կատարել եմ»։

Պողոսյանի համար վիրավորական է նաև այն, որ թաղապետն իրեն առաջարկել է իր հաստիքը փոխարինել պահակի հաստիքով։

«Նորմա՞լ է, որ մասնագետին ուղարկում են, ասում են՝ գնա պահակ աշխատի»,–նկատեց նա։

Միջադեպի կապակցությամբ NEWS.am–ը զրուցեց նաև Շենգավիթ վարչական շրջանի ղեկավար, 28–ամյա Ռազմիկ Մկրտչյանի հետ։ Վերջինս հերքեց աշխատակցին հարվածներ հասցնելու վերաբերյալ տեղեկությունը։

Մկրտչյանի խոսքով՝  դեռևս չորս ամիս առաջ նրա աշխատանքում թերություններ է նկատել և հորդորել շտկել դրանք, սակայն տեսնելով, որ նա շարունակում է աշխատանքները ոչ պատշաճ կատարել, հորդորել է, որպեսզի նա իր դիմումի համաձայն ազատվի աշխատանքից:

Հարցին, թե ի՞նչն է պատճառը, որ չորս ամսվա ընթացքում իր աշխատանքում թերացած  աշխատակցին նկատողություններ չի տվել և այդ հիմքով չի ազատել աշխատանքից, թաղապետն արձագանքեց.

«Չորս ամիս շարունակ մարդը ինքն է խնդրել, ասել, որ դիմում կգրի։ Պատճառաբանում էր, թե երեխայի ծնունդն է, իր ծնունդն է, ասում էր, իբր իրեն աշխատանք կգտնի՝ նոր դուրս գա։ Հաշվի առնելով այն հանգամանքը, որ ես եմ իրեն ընդունել աշխատանքի, նկատողություն չեմ տվել, այլ հնարավորություն եմ տվել սովորելու։ Մեր խնդիրն այն չէ, որ նկատողություններով մարդուն հանենք աշխատանքից, մեր խնդիրն այն է, որ եթե մարդը չի բավարարում իր հաստիքին, պետք է տեղափոխվի. մենք նրան պահակի աշխատանք ենք առաջարկել, ոչ թե ասել ենք դուրս արի աշխատանքից»,–նշեց Մկրտչյանը։

 Հարցին, թե տվյալ անձին աշխատանքի ընդունելուց մի՞թե չի պարզել՝  արդյոք նա ունի բավարար հմտություններ իր վրա դրված պարտականությունները կատարելու համար, թաղապետն արձագանքեց.

«Այդ մարդը կարողանում է համակարգիչ սարքել, բայց խնդիրներ են ի հայտ գալիս, որ տեսնում ենք՝ մարդը չի կարողանում դրանց տիրապետել։ Իրեն պարբերաբար զգուշացրել ենք. ասել ենք՝  կամ սովորիր, կամ ազատման դիմում գրիր, անգամ խնդրել ենք Նուբարաշենի թաղապետարանի աշխատակցին, որ մեր օպերատորը գնա և նրա մոտ սովորի, սակայն մարդը չի գնացել։ Եթե հինգ հատ էլ նկատողություն տայինք, միևնույն է՝ խնդիրը չէր լուծվելու, եթե մարդը չի կարող դա անել, ուրեմն չի կարող»,–ասաց Մկրտչյանն ու հավելեց. «Մենք ամեն օր նոր բան սովորում ենք, թող մի բան ավել կարդա, մի բան ավել սովորի։ Ես իրեն ասել եմ՝ տես,  ես օրինակ 15 րոպեում վիդեոռոլիկով նայեցի և դա սովորեցի։ Իրեն ցույց ենք տվել, թե ինչպես հեռախոսով դա սովորի. այսօր համացանցում ամեն ինչ կա, մարդը եթե համակարգիչն էլ չկարողանա սարքել, կարող է գրել՝  «ինչպես սարքել համակարգիչը» և իմանալ։ Եթե մարդ ցանկություն չի ունեցել, չի էլ ֆայմել, էլ ի՞նչ ասենք»։

Հիշեցնենք, որ երեկ՝ հունիսի 18–ին, Գևորգ Պողոսյանը դիմել է ոստիկանության Շենգավիթի բաժին և հայտնել, որ օրեր առաջ Շենգավիթի թաղապետը, տեղակալն ու օգնականը ձեռքերով հարվածել են իրեն՝ պատճառելով մարմնական վնասվածքներ։ Ոստիկանությունից NEWS.am–ին տեղեկացրին, որ դեպքի կապակցությամբ նյութեր են նախապատրաստվում, կատարվում է քննություն։


News.am

Комментариев нет: